سخرية الأقدار ،،،

الصورة المرفقة دي حكايتها معاي حكاية.....
تصدقوا..... أنا من أمس بحاول في الشبكة عشان أنزل منشور حلفت الشبكة إنها ماتحمل أية صورة وكنت عاوز أنزل صور خاصة برحلة عملناها يوم السبت عشان أتحدث عن الرحلة والطرائف الحدثت فيها لكن الشبكة طلعت لي لسانها طول دا وأبت تنزل الصور .... وبالعكس نزلت بطارية الهاتف وماعرفت أعمل شي وفات يوم بحالو ....

الليلة من أصبحت بحاول في تنزيل وتحميل الصور برضو الحكاية هي هي.... وفجأة هبشت شي في الجهاز ماعارفو ياتو مفتاح ظهر لي شروم دا بسنيناتو المافيشات ديل وكأنوا واحد من شفع القدر أبوه رسلو عشان يسخر مني.... أنا كمان قلت حرررررم الجنا دا مايرجع ساي إلا بعدما أملاه فقر وأضحك علي أبوه وأنزل جناهو في منشور.....!

من طرائف الأقدار إنو الإنسان أحيانا يكون ناوي يعمل حاجة ويصر عليها ويفشل ويصاب بالإحباط والفتور .... وفجأة يقوم يعمل آخر محاولة ويعكس طريقة عملو ويلقي نفسو نجح....
ودا زي الزول داخل غرفة مغلقة وعايز يفتح باب الغرفة فيقوم يجر الباب ( كالعادة) عشان يفتحو ويلقاه مغلق بقوة... ويحاول مرة تانية بقوة أكتر والباب يعاند .... ويحاول ويحاول لمن يفتر وييأس وفي النهاية وبعد مايقر بفشلو يقوم يدفع الباب للخارج بدل ماكان بجرو للداخل ويقول... خلاص إنسد للأبد ليتفاجأ بأن الباب إنفتح بسهولة ( زي باب العربية).... فيضحك ويقول في نفسو .... والله أنا كلمة حمار علي بسيطة....!

أها زي الحالات دي أنا بسميها سخرية الأقدار..... وكتير مننا بكون واجهتو حاجات زي دي وماعرف يتصرف.....

إتذكر مرة وأنا صغير كنت سارح بالغنم بعد أيام العيد وكنت لابس جلابية دبلان ( نوع من القماش) جديدة عيدت بيها وأبيت أقلعها رغم تهديد ناس البيت لي.....
وأثناء ماأنا سارح لقيت شجرة نبق قصيرة كدا ووالدة جنس ولادة... مليانة دب ( بكسر الدال) بالنبق.... فبدل أجدع لي حجر وأجمع النبق المتساقط قلت أطلع وألقط النبق من فروعو..... وفعلا طلعت زي الأبلانج وقعدت ألقط والغنم سرحن بعيد وفجأة إنتبهت وقلت أتلب( زي حرامي القلوب ) وأحصل الغنم.... وتلوووووب نطيت لكني لسخرية الأقدار ماحصلت الواطة..... إتخيلو حصل شنو ......؟
‏:
‏:
‏:
‏:
‏:
‏:
‏:
‏:
‏:
طرف الجلابية وفي محل الكفة التحت مسك في رأس فرع مكسور وبقيت معلق زي لحمة الخروف في شنكل الجزر..... غايتو كانت حكاية.... طبعا قماش الدبلان الجديد قوي ومابتمزق بسهولة وفوق ذلك أنا كنت خفيف ... يعني مابالتقل الممكن أقطع بيهو قماش دبلان مدبل لتلات أضعاف( محل الكفة).... وبقيت متوطح لا لاحق الواطة ولاقادر أحصل الفرع فوق.... ومافي طريقة إلا أصرخ وأجوط زي المجنون في بطن الوادي.....!

وبديت في الصريخ ومافي أي رد أو مساعدة وخلاص بقيت أشوف النجوم في عز الضهر وعرفت إني ميت ويمكن بكرة ناس الحلة حيجو يلقو جلابيتي بس لأن أكيد المرفعين حيتعشي بي..... ولما جاتني ذكري المرفعين خفت خوف عجيب وقلت أقوم أشرط الجلابية وأتملص ....!

سبحان الله فجأة وعلي ذكر شريط الجلابية جاتني فكرة جهنمية.... ليه أشرط الجلابية وأبوظها وبعدين آخد لي علقة في البيت......؟
ما أحسن أفك الزراير بتاعت الكرشليت ( الكرشليت هو الجزء الذي يخاط فيه الزراير علي الصدر)...... وفعلا براحة بقيت أفك الزراير واحدة واحدة وفي النهاية إتملصت عبر الفتحة دي زي الجنا البلدوه ياداب ووقعت في الواطة.....!

ولمن طلعت الجلابية من الفرع لقيتها سليمة لكن أبيت ألبسها وطبقتها كويس وربطها في صلبي وجريت حصلت غنمي..... ومن اليوم داك تاني توبة جلابية في الخلا .... لا...

كونوا بخير وصباحكم ‏Zain

جديد مواضيع عامة Slider 10:08:00 ص