الدجاج الحبشي ،،،

طبعا في ناس كتار بكون ريقهم جمة( سال) من ما شافوا صورة الطائر الداجن العجيب دا.... لأنو بيعتبر من أحدي أشهر الطيور الداجنة ذات اللحوم الطاعمة ...... الناس بتسميه ب( جداد الوادي) ولكن ماحصل ولا زول في يوم سأل عن الوادي دا.... فهل دا وادي سيدنا في أم درمان... ولا وادي حلفا في الشمالية ... ولا وادي كجا في دارفور ....؟

الغريبة إنو ولا واحدة في الوديان دي.... وإنما هو وادي خارج السودان ... وجداد الوادي إسمو الحقيقي في شهادة الميلاد هو ( دجاج وادي غرب إفريقيا).... وعشان كدا الناس سمت النوع التاني الشبيه ليه "جداد كنو" نسبة لمدينة كنو ( كانو) في غرب إفريقيا...... لكن شوف أعراب الحجاز بسموه بالدجاج الحبشي ( غايتو جنس حسادة) .... أنا ماعارف ناس الحجاز ديل حكايتهم معانا شنو ..... حتي جداد الوادي ماعايزين ينسبوه لينا ... ولما الناس أطلقوا علي الفول إسم ( الفول السوداني) هم سموه فستق العبيد( إتخيل)......!

نرجع لجداد الوادي حقنا المعروف دا ونقول أن الأونشو بسموه كوتو ( تقرأ كوت تو بتشديد التاء) والكتار بسموهم كوونق.... وهي بتعتبر من الطيور الضارة بالزراعة في موسم التيراب لأنها بتحفر كل البذور ومابتخلي ولاحبة في الواطة ولأنها بتجي بأعداد كبيرة في الزرع مما يضطر المزارع لتكرار وإعادة الزراعة لأكثر من مرة ويكون محظوظ لو جات مطرة وغطت التيراب وكدا جداد الوادي يخلي البحت والحفر وإلا حيصل معاك حتي الدور ( ربع النهائي) في الموسم الزراعي ويحددها معاك عديل...... وفي ناس تخصص جداد وادي .... كنا نلقاهم يشركوا بالشباك ويصطادوا أعداد كبيرة منها ولو مشيت بيوتهم تتملي لحم جد..... وزي الجماعة ديل هم البصلو دوري (تحديد البطل) مع جداد الوادي..... وأكيد بالنتيجة دي البطولة معروفة هي لمنو فيهم.....!

وبعد خلاص الحشائش والشجيرات تقوم الكوونق بكونوا شبعوا ويبدأوا في رمي البيض ... ودا طبعا موسم فرح الرواعية(الرعاة).... وكنا نشيل معانا فردي (توب الغطاء) عشان نجمع بيه البيض ( كوتونجول) .... وأحيانا كنا نجيب بين تلاتين لأربعين بيضة.... ومرات بنجيب البيض وأمهم ذاتها معاهم......!

وطبعا حكاية إصطياد جداد الوادي دي قصة بحكيها أي زول سرح بهايم قبل كدا وعرف حرفنة الصيد بالتور وكيف يتخبأ وراء التور ويمشي بيهو بطريقة تكتيكية مألوفة وحتي التور بكون موالف لهذا النوع من الصيد..... وفي نهاية اليوم يجوا الرعاة وأي واحد معلق كم جدادة وادي في قرون تورو وهو فرحان يقدل ويروري..... والتور برضو يقدل ويخور .... ( تقول دا هو الإصطاد الجداد)......!

طبعا الأيام دي دا زمن لحم جداد الوادي وبيضو لكن ياخسارة..... وين هي الوديان.... ووين هو الأمان.... و (حتي الصيد رحل خلاني وماطيب لي خاطر).... ومع الوضع الأمني المزري دا بقينا بدل نتلذذ ببيض الكوونق ولحمو الطاعم ، أصبحنا ناكل بيض البطري وجداد القوصي والعربي ( نسوي شنو .... مجبورين والله).... الله يجازي الكان السبب....
كونوا بخير وصباحكمSudani

جديد مواضيع عامة Slider 12:44:00 م