إرلوم

طبعاً فى ناس كتااااااار ماحيصدقونى لو قلت ليهم إنو الأفعى الفى الصورة دى من الأفاعى الأليفة ......
أيوا من الافاعى الأليفة ويمكن إستئناسها فى البيوت زيها وزى أى كديسة..... وكمان تربيتها أسهل من تربية الكدايس....
زمان حبوباتنا كانن بربن نوع الأفاعى دى داخل بيوتهن ولو جيت بالنهار صدفة ودخلت الكلوورى او المطبخ تلقاهو ممد وراقد جنب ماعون ملآن عجين أو ملاح......ولو شافك مابشتغل بيك لأنو بكون شبعان.....
أما بالليل فهو بقابض فى الجرذان والقوارض البتخش المطبخ بدون أذن....

الأونشو بسموه (إرلوم) ويوجد منو نوعين حسب اللون.... واحد بالأسود والابيض والتانى دا الظاهر فى الصورة .... ويعتبر من الأفاعى التى تتميز بالحنكشة والدلال وتقضى كل أوقاتها فى الدعة والنوم فى الأماكن الرطبة خاصة داخل القطاطى البتلقى فيها الأجواء المطلوبة دى.... ومرات بتبقى سمينة جد وبتبلغ حجم عائلى عديل......

والطريف إنو الكنداكات زمان لو أقيمت حفلة جنب بيوتهن وحمى الوطيس طوالى بخشن ويشلن صاحبنا ويجن مارقات يبشرن بيهو للحكامة..... وطبعاً مابثبتوا إلا الراسخين الملمين بصفاتو..... لكن الزى ناس محمد نياتو ديل إلا يشوفو ليهم مخارجة سريعة عشان يحفظو موية وشهم......
والشى المضحك جداً إنو صاحبنا الالروم دا وعلى ضخامة حجمو المخيف دا إلا إنو( قلبو كبير) جداً لانو ماعندو أى نوع من أسلحة الدفاع عن النفس غير ( الإسهال)..... هههههه....ههههه..... أيوا الإسهال..... فلو عصرتو فى محل ضيق او ضربتو برفع ضنبو وبفك فيك إسهال أبيييييض.... وأثناء إنشغالك بنظافة الإسهال من جسمك بكون إتخارج ولا شاف ليهو جحر ولبد فيهو...

وأفعى الارلوم يعتبر من أجمل المخلوقات من حيث لون الجلد وعشان كدا فى جماعة متخصصين فيها وبصطادوها عشان جلدها الثمين البشبه جلد الأصلة.... لا بل أجمل منها لأن جلد الأصلة فيهو خشونة بينما جلد الإلروم ناعم الملمس ولامع جداً وبراق يعكس الأضواء..... وطبعاً لو إنتعلت ليك منو جزمة الناس تانى مابتعاين ليك فى وشك..... تحت بس.....
وكتير لاحظت فى بعض القنوات الفضائية فى جماعة سمان كدا بركبوا عربات ذات دفع رباعى بسافروا عديل كدل من بلد لبلد عشان يصطادوا نوع الأفاعى دى وببيعوها إلا بالدولار.......بختهم.... ديل لو جونا هنا حيغنوا جد لان عندنا منها آلاف مؤلفة فى الكدو.......
غايتو هى فكرة لكن منو البقدر على تنفيذها ......منو......
أحسن خليكم بعيد ...... وكونوا بخير..... وصباحكمZain

جديد حيوانات وطيور 10:57:00 ص