الأوتينال

هههههههه..... ماعارف ليه من ما الصورة دى واجهتنى لقيت نفسى مفقوع من الضحك للتعبير المرتسم على وجه عمك دا.....وكأنى به يقول..... نقيلى أبودوريندى نقيرى شار...
والمعنى.... هسا أضربك كدا.....!

الصورة والعبارة معاً تذكرنى لمن كنا نمشى الأوتينال( العِد) حيث جمهرة الناس وطالبى السقيا للبهائم وكنا نلقى الناس زى الزمن دا ( نهاية أبريل يعنى) .... تلقاهم أى زول أخلاقو فى نخرتو من شدة الضيق والعطش... والمعروف إن شهري أبريل ومايو من شهور الصيف الجدبة والموية بتشح فيها وتنضب من الآبار..... وتلقى الناس من الرابعة فجراً بكونوا رفعوا التمام فى الأوتينال من باب (ودالبدرى سمين)..... ولكن وين نلقى السُمُن مع شهر أبريل ومايو العجاف ديل......!!!

فى الزمن داك تلقى الشياب (بمرقوا من كيسهم) وبتبدلوا لناس تانين ولو ما شديت حيلك وصبرت يمكن تحرج نفسك معاهم لأن أكبر همهم فى الوقت داك هو سقاية غنيماتهم أو حمارتهم الهزيلة.... وتلقى الواحد يفرض عليك إنك تعطيه الأولوية فى السقيا .... لا وكمان تغرف ليهو الموية من البير وتملأ ليهو الأر ( تبريب)..... وطبعا إنت ذاتك بتكون صاحب حوجة زيو... ويمكن أكتر ...... لأن بمعيتك أبقار إنت مسؤول عنها أمام صاحبها كأجير يجب الإهتمام بيها ورعايتها حق الرعاية.....
تعمل شنو مع الوضع الصعب دا... أكيد بكون معاك خيارين.....
ياتطنش من عمك الشايب دا وتبقى زول غشيم وما محترم..... ويجيبوا خبرك فى نشرة تمانية فى الضرا....

ويا تواجبو وتأخر نفسك وتعطش بقرك...... وتلقى درجاتك مؤخراً يوم الشُولكى فى شكل تزكية من أعمامك الخدمتهم ذات يوم.....( ودى مطلوبة مية المية).....

المهم كنا مرات بنقوم بالتنسيق مع بعض ونقتسم غنيمات عمك ونسقيهن ليهو فى عدة مواقع وكدا نتخارج منو بالسلامة أو ننجبر ونسقى ليهو من بير واحدة على حساب أبقارنا.......
وبعد التعب دا كلو تلقاهو يقول ليك.... نوشر تتى بُوركُوندو..... أى  أمش ياأبوكرش.....ههههه..... والله الشياب ديل ...
مشكلة...
بس لازم نحترمهم لأنهم برضو جدودنا وقرايبنا وكبارنا.... والماعندو كبير يشترى ليهو كبير...... ولا كيف ياجماعة.....
كونوا بخير وصباحكممZain

تقاليد وعادات جديد Slider 8:42:00 ص