شوكرديا

 

مع موجة البرد الشديدة دى أكيد الناس بتكتر من شراب الحاجات الدافئة زى الشاى والبن وحتى المدايد.... ودى كلها حاجات بتحتاج إنو يضاف ليها السكر لزوم تحلية المذاق وتوفير مواد طاقة.....

لكن الطريف إنو فى مخلوقات تانية مزاحمانا فى السكريات دى رغم إنها مابردانة زينا كدا..... وهى نمل السكر المعروف بالإسم الحركى ( أبوعشة)..... وطبعا أى زول سودانى عارف أبوعشة دا شنو.....

بس الشى المامعروف عن أبى عشة دا لحد اليوم ومافى زول قدر يحل اللغز دا إنو كيف هذا الأبوعشة بدخل فى أى ماعون فيهو سكر مهما أحكم إغلاقه..... طبعا زمان كنت بتلقى فى أى بيت سودانى إن الناس كانت بتحفظ السكر فى علبة لبن البدرة بعد إستهلاك اللبن وتبقى العلبة هى الماعون الرئيس للسكر.... وكنا فى كل صباح نفتح العلبة نلقى أبوعشة سبقنا وشال حصتو التموينية من السكر وقاعد راجينا عشان نفتح ليهو العلبة ويخرج..... وبكرة برضو نلقاه قاعد داخل العلبة.....ياخ دا كان معذبنا ويومى خامى من سكرنا كم وقية...

أتذكر قبل كم سنة كدا أنا نزلت منشور وتساءلت عن سر وكيفية دخول أبوعشة فى ماعون السكر وقلت يمكن ألقى ( وصفة تنفع... حاجة تشفع...أو حاجة تخفف الجرح القديم).... لكن مافى ولا زول عبر لى أو حن على وحاول يطلعنى من ورطتى مع أبوعشة دا...... 
واليوم برضو أعيد تساؤلى أمام الأجانق كلهم  بس عايز أى واحد منكم يورينى كيف أبوعشة دا بدخل فى علبة السكر المقفولة بإحكام.......

ونسيت أذكر إنو الأونشو بسموه... شوكرديا...... أى شارب السكر وما عندو إسم تانى.... ماعارف ليه رغم إنو أبوعشة دا موجود قبل إختراع صناعة السكر بالشكل المعروف دا......
 يلا كدى حلوا لينا اللغز دا ..... وكونوا بخير وصباحكمZain

جديد حيوانات وطيور Slider 10:52:00 م